صفحات من كتاب حياتي نصحوني الله يخليلكم كل عزيز

الصفحة الاولى


السلام عليكم اخوتي في الله نعرفكم براسي فالاول انا واعوذ من قول أنا عضوة قديمة معاكم هنا فالمنتدى هاداعام والزيادة تقريبا. طرحت بزاف ديال المشاكيل و لقيت تجاوب ودعاء من العضوات الفاضلات الله يجازيهم بكل خير


اليوم قررت نكتب صفحات من كتاب حياتي لان الكتابة هي اللي بقات ليا كوسيلة نخرج بيها اللي عندي لداخل .سميت راسي الالام لانني تنحس بالفعل بالام فكل لحظة من حياتي باليأس و بالظلم و زيد وزيد وفكل مرة تنقول الحمد لله على ما اعطى وتنعاود نوقف من جديد ،تنحاول نتمسك بخيط الأمل تنحاول نصنعو من خيالي وتنقول صبري لازم غدا غادي يكون حسن ايلا ماكانش غدا يكون اليوم اللي موراه ايلا ما كانش يكون الاسبوع الجاي .الشهر الجاي حتى بديت تنطلب ان وضعيتي مصاب تبدل للأحسن من هاد السنة للأخرى لكن الواقع المر وراني أن الحياة ماشي هيا نهائيا داك الشي اللي كنتتنتمنى

انا انسانة بسيطة بزااااف فوق القياس انا الكبيرة فخوتي عشت طفولة اقسى منها ماكان المشكل اللي كان عندي انني انسانة حساسة بزاف الاب ديالي كان خدام اطار، بحكم الوظيفة ديالو ماتيعرفش معنى الاحاسيس او العواطف تيعرف يصرف علينا يقرينا وصافي مايلعب معانا ما تيحسسنا بوجودو فاش تنشوفو تتجي لمخيلتي نوضي بكري، قراي، تعلمي طيبي الحياة خايبة فيها الاجرام فيها القتل دابة تشوفي والخ من التهديدات والنضرة السوداء للحياة وانا مزال طفلة 10سنين يمكن ،ماتصاحبيش مع البنات مكاين خروج ماوالو من الدار للمدرسة وبالحراسة وانا من الصغر وانا تنحس بالضيم عندي طاقات فالغناوالرسم لكن ماعنديش لافين ولاكيف نخرجهوم


المهم الام ديالي هديك قصة اخرى تزوجات صغيرة باش تهرب من واقعها المأساوي اللي كانت عايشاه فدارهومحتي هيا وتزوجات الاب ديالي اللي تيكبرها بزاف لارغم ان التجاوب بيناتهممنعدم واحد تيشرق والاخر تيغرب . الام ديالي عندها وظيفة المنزل و الطبخ وانجاب الاطفال حتى هي لاخروج لادخول هو تيبقى النهار كامل فالعمل هي فالدارو منين يدخل ياكل وينعس هي بما انهامزال صغيرة فالعشرينات بغات الراجل اللي يفششها و يعيشها بالحب والحنان لكن للاسف داك الشي كلو مالقاتوغير تيشوفها انا عيان بالخدمة المهم عيشها واحد الضغط معنوي رهيب الاغرب ان الناس يعرف احاسيسهم ويدير الواجب معاهم واحنا كاين الواجب ديال احضار اللاكل وشنو خاص الدار بواحد الطريقة بخيلة بزاف نعطيكم متال الرئيس ديالو يمشي يشري لو اغلى انواع الفاكهة والكترة اللي تقدر توصل ل 500 درهم فالمتال حنا فاش نطلبوه مابقاليش ماعنديش

هادشي كلو تنعيشو وتنتالم بصمت واللي كمل علينا وعلى الواليدة ديالي اننا كنا تنتاقلو بزاف وكانت بعيدة على دارهوم وخوتها

يتبع

بالرجوع إلى:

"حياتي"
- صفحات من كتاب حياتي نصحوني الله يخليلكم كل عزيز - منتديات الجمال المغربي (نظرة على ويكي Google الجانبي)